Blog

今次幫友做一個五層結婚大蛋糕，令人興奮的是，整個餅沒一層是假狗! 如假包換，已經夠興奮喇。 不過很快就回到現實世界，最頭痕如何運送，睇到呢個哂冷陣容都知...... 開工! 層層疊中，12"...10"...8"...6"...4".... 經過一堆切刎刨補填唧，Tada! 成品出來啦! 漸變粉紅送到會場，在現場燈光下看十分討好，之前在廚房白光燈下都沒那麼好看。 對啦，講返運送。 Delivery 比造餅難10倍，大家前一晚已經忐忑不安，明明眼前已經有一架運送架車但仍然好像沒有安全感，帶著問題入睡的結果就是睡一覺後醒來又想到些東西，於是連跑帶跳走去弄發泡膠回來放車上做避震，切foamboard做蛋糕盒，再帶定一向送餅都傍身的「救命Kit」，吸一口氣出發。樓下有GogoVan 5.5噸貨車待命，上車後我們就在不見天日的密室內了。紮好馬磅實蛋糕，司機一開車，搖下搖下的感覺和平日完全不同，大事不妙，簡直好像身處失事飛機內，無方向感，很吵，亂搖，失重心平衡，又刺激又恐怖。 渡日如年，10分鐘車程好不容易完成，聽到司機熄車的聲音簡直好樣雨後陽光! 蛋糕安全到達，除了我們的努力外，司機應記一功!司機 I love you! (笑)

Barbara 同 Mandy 都係我地常客。今次收到Barbara「長氣」留言，Solo老師直呼「感動到想喊」。 呢啲就係我地辛苦工作但仍然繼續堅持既原因喇。(笑)

相片右手邊見唔見有半隻手？佢係全場唯一嘅男同學，但佢做蛋糕係全場最靚，睇下右下角個蛋糕就知。 呢個同Ironman有八成似既靚佬，高大威猛但係舉止低調溫文 (嘩!!) ，原來黎做蛋糕追女仔既 (o車..)。 3星期後佢再返黎幫襯，告知已經成功「佢已經做左我女朋友啦」然後多謝我地，讚蛋糕好食，係成功功臣之一。 我地果刻掩面無言，好感動。

教室一角這面牆貼上好多回憶，在3月尾某日突然多了一張即影即有，是CEO的朋友到訪。 是一對年輕夫婦帶著幾個月大的BB女兒，還有從澳洲Working holiday回港的舊同事。結果可想而知，正當一般人應該困在公司，當天下午這裡卻變成懷舊歡樂小天地，吵得很。(笑) CEO一直形容那爸爸抗拒小孩，說有一次他在大夥漢子面前拍哂心口：「我一定唔會學你地post個女張相上fb!」，半夜三更還在跟一堆單身漢子打GTA，不怕嘈醒BB？仲唔係瀟洒哥？我曾一度懷疑「咁唔鍾意，生黎做乜呢？」 今日再見真身，面對面睇又係另一回事。以後漢子口中話，都係信一成算數! 今日Studio內親眼所見，父愛爆棚， 「BB你醒啦？*muah*!」當住你咁多對眼面前，俯身嘴落個女度。 「BB你睇下條街？睇下呢度？睇下果度？.....」 抱埋個女去窗邊睇街街。 一個麻甩佬即時融化大家的心，哈!

為左個仔，你可以去到幾盡？ 爸爸為左個仔生日，來單對單上堂做慈父牌Birthday Cake，一做就足七粒鐘。(嘩) 悠閒週五下午時間，特地播著cosy的cafe music，期間一直天南地北。Cakeaway 搞不少親子班，小朋友見得多，順道又訪問下這位爸爸。 「我覺得人到某個年紀就應該生仔。」爸爸淡淡然，似在說別人的故事。 好像生命很公式化的樣子。 回想起80年代，我爸爸會為我搞生日會，但未曾親手做生日蛋糕給我，那個年頭這行為好像怪怪的；現在可不一樣， Cakeaway 開店以來還不止一個爸爸來親手做生日蛋糕給兒子 ( 還是很熱心誠意的單對單上課) ，在這個年頭真愈來愈多，我只是暗忖小小人仔，長大是否仍記得老爸當年一番嘔心瀝血？拜託一定要記得呀! 七粒鐘累死人呀。 爸爸後來將生日會的照片send給我看。一堆小小人仔圍在一起切蛋糕，開心到暈。 「我覺得人到某個年紀就應該生仔。」雖然爸爸這樣說，其實壓根兒就是因為鍾意小朋友才生孩子啦，唔駛難為情喎。(笑) 文：校長