好耐冇update blog，大家豬年快樂。
我地一直忙於出貨、出班，年中無休，直到每年農曆新年我地先會真正休息幾日（其實都唔算真正...新年期間照樣有客人電話／whatsapp查詢，不過我地就一定唔返工場開爐）。放假前大家發哂誓：「如果有客新年期間要蛋糕一定唔接，一定要真正休息！」因為大家確實好疲勞，腰背勞損的更加靠CNY爭取時間休息，整年無去旅行的更加急急腳飛走去放鬆。
但大家暗底都知個誓只係...係咁易發下，更加冇加個「毒」字在前面。前年Solo校長都要年初二返去開爐（上次係一田百貨要幫熊本熊慶祝生日，所以叫我地用熊本熊個頭做生日蛋糕，跟住要生日主角切爛自己個樣）exactly就係初頭話「新年死都唔開工呀」結果因為主題太吸引於是都決定要做。
今年又係發完「誓」之後，又有極吸引主題引誘校長 －－－－－ 做磁浮！幻想到成品太好玩，所以今年又決定破戒新年開爐。邀請大家睇左成品先：
蛋糕上面的主角係Julien，係一位 Aerial Dance 導師，任何空中運動例如Hoop、Pole、Silk、Flying Fantasy （類似吊威也的舞蹈）佢都樣樣皆精。校長睇過Julien上 2017 Asia's Got Talents 時的表演，其實都幾感動。2019年佢決定留港開設Air Dance Studio，蛋糕就係開張加Julien生日用的。最初對方構思只係在蛋糕上面打印食用Logo就ok，但諗諗下，Julien玩Hoop呢個主題，如果唔趁熱加入磁浮就真係浪費左大好機會了，因為成件事實在太Match，唔係所有主題都o岩玩磁浮但今次真係o岩哂。所以年初三返工做蛋糕都覺得好值，一於玩磁浮！
然後惡夢先開始。首先，新年前要試到磁浮成功先。
搵磁浮device係最花時間同精神，價錢唔平，買左返黎試重量，你知有D國內產品，同你講承重1kg但落到黎其實只承到300g都有，完全唔得。所以中間又要去搵local公司搵device。
然後就要去搵盡量輕身的物料做公仔、金色環，尤其個環，走好多地方搵先搵到咁輕咁幼又係金色的。加上新年前倒數日子先左騰右騰去搵物料，其實時間比平時更趕。
所以單是磁浮公仔一part的製作，就已花了兩星期先完成，係每日兼顧平時出貨同出班之後再花時間研究的，好彩as planned 可以在新年前搞掂，否則成個新年都會發惡夢。不過而家回想，其實玩新野係又累又開心的。
而「非磁浮」那part，即係下面個蛋糕就更加係駕輕就熟，只需要年初三回來開爐就得，的確係抖少左一日。不過老土都係o個句，聽到大家現場大叫蛋糕好靚，真係新年開工都值回票價。
